下篇
講多少少先,筆者去總商會攞証個時,總商會問過筆者去程同回程時間,筆者問總商會點解要講低呢? 原來係因為海關未必有人係到,佢地會通知海關呢段時間會有車過關。 當時筆者聯想到總商會所指既海關應該指國內海關了
費用方面如下:
運輸署 HKD45
中旅社 HKD500
總商會 HKD720
蘇黎世 HKD300
(自駕遊車輛關稅責任擔保)呢個車輛關稅責任擔保係咩嚟呢? 其大家部車入口中國係需要打稅,因為如果部車入口左中國後唔再出口,理應要打稅,但由於自駕遊只係短暫進出口,但清關手續其實都必需做足,咁有咩方法可以証明大家部車必定會返嚟香港呢? 廠商會 會評估大家部車既價值,例如估值係10萬蚊,總商會會要求提供現金或擔保作為相關的關稅責任抵押,但由於咁做真係會增加大家麻煩,所以蘇黎世會做擔保,大家只需比車價既估值0.1%既費用,(最低收費係HKD300), 就唔需要籌備現金抵押或向銀行申請擔保喇。
另外,筆者仲係中國太平保驗買左跨境車主責任保險,因為國內既強交險只係賠償車外既人,而且賠償只係10幾萬人民幣,真係完全不足夠。 而呢份保險要HKD350
一共費用係HKD1,915.00 而呢筆費用未計之後買既旅行保險
另一點需要留意,暫時香港除左蘇黎世可掀供國內自駕遊汽車損毀保障,但只適用於現有蘇黎世汽車保險全保之客戶。
講完費用,就講出發當日喇,首先筆者先用GPS 記低晒要去既地方先,咁樣做會方便好多,唔洗到時先再搵。 先提一提,當日依段時間只係得筆者一部車,當日過香港海關非常順利,而且10分鐘內完全完成晒所有手續,唔需要落車,但,係國內關就等左好耐,足足有成45分鐘以上,點解咁耐? 第一,海關無人,要自己落車行去辦公室搵關員幫手,第二,國內海關話廠商會電子備案打錯野,對唔到資料,要等攞授權,第三,要自己同關員行去辦公大樓簽名。
所以時間耐左,不過大家亦都兩方面睇,如果計劃成功既,汽車流量多D, 筆者相信以上事情係絕對唔會發生,因為做一部車要成1小時以上,政府目標係一日50部車,咁一日得24小時,而且西部通關時間係6:30至0:00,根本達唔到政府目標。
另外,同行有一友人唔係成日返國內,佢同筆者講返頭先見到d國內關員既語氣好惡,好不禮貌,其實大家亦都唔需要驚,因為國內既文化係咁。
最終,都順利過晒關正式向國內出發,我地既目的地係佛山。
係國內楂車,第一,最好係行中線,因為國內司機由小路出嚟係唔會讓既,行中線有咩事都可以避一避
第二,唔好跟前車太近,最好有4-5個車位,因為好多時國內司機話停就停,唔會理你既,所以一定要留返多d位比自己,
第三,國內最左手邊係快線,最右手邊係慢線,同香港係調返轉既
第四,紅燈係可以右轉
第五,行錯路唔洗怕,因為有GPS帶住你,而且國內好多地方都可以調頭
第六 ,國內既朋友成日都講笑咁講,一台車無頭燈都唔怕,最緊要可以響號。 國內司機已經習慣左響號(響按),大家一見其他車無啦啦cut線之類而影響到自己,記住要響號
第七,必需有足夠既零錢,因為國內路費比較多
開始既時候,筆者都有D擔心,因為上佛山最快都要2個多小時,但連筆者自己都估唔到,楂左大約10分鐘左右,已經開始習慣,不過最唔習慣既係國內司機cut線唔打燈,同埋兩車好近好窄都會cut埋嚟,所以,除左要留意前車既距離外,仲要好留意左右兩邊既車,同埋估計佢地下一步既動作。不過亦都想講,呢類型既司機其實唔止國內,香港其實都唔少呢類司機。 當筆者行廣深高速同莞佛高速時落起大雨,同時,亦都發現另一個問題,就係因為大巴經常性行個條中線,會導致路面凹陷,加埋水漬會好容易令到部車搖擺不定。各位真係要小心。
平安到達佛山後,筆者與同行友人先到達酒店,而車先泊在酒店露天既平台,通常你同酒店講稍後會再外出,佢地都會安排到位置比你暫時停泊。 當然,泊車時盡量泊返有閉路電視既地方,而且唔理泊幾耐時間都好,都要鎖返防盜鎖,而筆者之前都講過,因為買左GPS追蹤器,所以都會開埋放係車內既隱蔽位置。而車內既GPS導航也會一同拆走。
當筆者外出食飯,購物等等,當泊好車,都會做足以上動作,而最夜都係8:30前返到酒店,一定一定唔好獨自出夜車,人生路不熟,小心為上。
最後,由國內回香港時過關比去程時快,大約只花左20分鐘便可以通過兩地檢查,不過回港時需留意,香港海關會叫你將車駛入檢查站,而全車人都需下車,由香港海關人員檢查車上物品,筆者檢查時詢問過海關人員,他們告知因有份文件需要筆者簽名,而且總商會份暫準出口證需蓋印,所以有一次性臨時過境既私家車都需要入檢查站。
講到檢查,大家準備回國內時行李箱盡量清空一點,因國內海關也會要求打開行李箱檢查的。
後記:
申請自駕遊,筆者認為最重要是考慮自己是否有信心應付國內既交通同熟悉國內既文化,其次就係要考慮用接近HKD2,000既價錢同需時處理多份文件。 此計劃暫時未能成功既原因,筆者都覺得文件上太多,如可簡化一點會比較好,而且,大部份港人也擔心在國內既自身安全。 筆者不是支持或反對,因兩地均有不負責任既駕駛者及良好既駕駛者
Share this: